Magtymguly

 –

Saýlanan eserler.  Iki Tomlyk.  Düz.: A. Nazarow, A. Mülkamanow, M. Öwezgeldiýew we başg. – A.: Türkmenistan, 1983 

  

    

HEZAR ASTANA SARY

ХЕЗАР АСТАНА САРЫ

 

 

And* adam sowular
Hezar** astana sary.
Pelek bakgal ötürmiş
Bazar astana sary.

Gara ýer agzyn aça,
Gapyldyr adam, geçe,
Bilbiller istär – göçe
Bag-u bostana sary.

Nurata, Baba Dargan,
Degresi derýa, gorgan***,
Bardy kary Bakyrgan
Şol Türküstana sary.

Hakdan rahmet sepiler,
Ymaratlar ýapylar,
Gitseň Käbe tapylar
Rumystana sary.

Gündogardan günbatar,
Tersa, jöhit hem tatar,
Şäherler hatar-hatar
Magrybystana sary.

Aşyk aýdar: „Ýa, subhan,
Müşgilim**** eýle asan.
Şepagat eýle, ýaran,
Şol Dehistana sary!“

Magtymguly tillener,
Gözde ýaşy sillener,
Günde göçdür, ýollanar
Mazarystana sary
.

 

* and  1. Birnäçe 

2. Üçden ona çenli san.

3. 15 mün ýyllyk dowür.

4. Buýanyň köki.

5. Iki manyly söz. 

6. Minnetdarlyk bildirme. 

7. Haýran galma. 

8. Umyt, isleg, arzuw.  

** hezar  1. Mün. 

2. Bilbil.  

***  gorgan köşk, gala, diwar, haýat.
****  müşgil kyn, çetin, aňsat däl.   

Анд* адам совулар

Хезар** астана сары.

Пелек бакгал өтүрмиш

Базар астана сары.

Гара ер агзын ача,

Гапылдыр адам, гече,

Билбиллер истәр—гөче

Баг-у бостана сары.

Нурата, Баба Дарган,

Дегреси деря, горган***,

Барды кары Бакырган

Шол Түркүстана сары.

Хакдан рахмет сепилер,

Ымаратлар япылар,

Гитсен Кәбе тапылар

Румыстана сары.

Гүндогардан гүнбатар,

Терса, җөхит хем татар,

Шәхерлер хатар-хатар

Магрыбыстана сары.


Ашык айдар: «Я, субхан,

Мүшгилим**** эйле асан.
Шепагат эйле, яран,

Шол Дехистана сары!»


Магтымгулы тилленер,
Гөзде яшы. силленер,

Гүнде гөчдүр, ёлланар

Мазарыстана сары.

 

* анд 1. Бирнәче 

2. Үчден она ченли сан. 

3. 15 мүн йыллык дөвүр.

4. Буянын көки. 

5. Ики манылы сөз. 

6. Миннетдарлык билдирме. 

7. Хайран галма. 

8. Умыт, ислег, арзув.  

** хезар 1. Мүн. 

2. Билбил.  

***  горган көшк, гала, дивар, хайат.
**** мүшгил кын, четин, аңсат дәл.