Magtymguly
–
Saýlanan eserler. Iki Tomlyk. Düz.: A. Nazarow, A. Mülkamanow, M. Öwezgeldiýew we başg. – A.: Türkmenistan, 1983
ÝUWTUP BARADYR
Kimler diýer: dünýä ýalançy, pany,
Süren armandadyr, ötüp baradyr.
Kimler elde tutup bu giň jahany,
Halal, haram, baryn ýuwtup baradyr.
–
Mertler gezer boldy namarda bagly,
Şirleriň tilkiden ýüregi dagly,
Pir bolup, peş* orap, betpäl seg** ogly,
Haram nebsin öňe tutup baradyr.
–
Binamys beg boldy, asylly azdy,
Azazyl dünýäniň syratyn bozdy,
Tüpbozan köpeldi, ýurt-bina tozdy,
Dogan, dost bir-birin ütüp baradyr.
–
Sözleşirler näme gelse dahana,
Ol hupbul-watandan*** tapyp bahana,
Bak ahuna, pire, soltana, hana,
Gurt deý gandym diýip, ýortup baradyr.
–
Magtymguly, zemin meňzär saraýa,
Ynsan bir mur****, ýygyp üýşir bu jaýa,
Olar jennet üzre dowzaha taýa,
Çagyran dek bolup, ýetip baradyr.
* | peş – selle |
** | seg – it. |
*** | hupbul-watan – watan söýgüsi. |
**** | mur – garynja. |